Меҳрибон ва раҳмли Аллоҳнинг номи билан бошлайман. (Аллоҳ таоло ўз китобини "бисмиллаҳ" билан бошлагани мусулмонларга ҳам ўрнак, улар ҳам доим ўз сўзларини ва ишларини "бисмиллаҳ" билан бошламоқлари лозим. Пайғамбар алайҳиссалом ҳадисларидан бирида: "Эътиборли ҳар бир иш "бисмиллаҳ" билан бошланмас экан, унинг охири кесикдир", деганлар. Яъни, баракаси бўлмайди, охирига етмайди.)

Олий қадар бўлган Роббинг исмини поклаб ёд эт.

У яратган ва мутаносиб қилган зотдир.

У ўлчовли қилган ва ҳидоятга бошлаган зотдир.

У ўт-ўланни чиқарган зотдир.

Бас, У уни қорайган хашак қилган зотдир.

Биз сенга қироат қилдирамиз, бас, эсдан чиқармайссан.

Магар Аллоҳ хоҳлаганини. Албатта, У ошкорни ҳам, махфий нарсани ҳам биладир.

Ва сени осон йўлга муяссар қилармиз.

Бас, агар эслатиш манфаат берса, эслатгин.

Албатта, қўрққан эсга оладир.

Ва бадбахт ундан четда бўладир.

У катта оловга кирадир.

Сўнгра унинг ичида ўлмай ҳам, тирилмай ҳам қоладир.

Батаҳқиқ, ким пок бўлса, ютуқ топадир.

Ва Роббиси исмини зикр қилса ва намоз ўқиса ҳамдир.

Лекин, сизлар дунё ҳаётини устун қўясизлар.

Ҳолбуки, охират яхшироқ ва боқийроқдир.

Албатта, бу аввалги саҳифаларда бордир.

Иброҳим ва Мусо саҳифаларидадир.